Sukaldean Sortzaile lehiaketa gastronomikoak edizio berri baterako deialdia egin du, gastronomiatik abiatuta gazteak eta helduak elkartzeko helburuarekin

• Ausolan Fundazioak, Ausolan enpresak eta BCC Culinary Club erakundeak antolatu dute ekimena, eta 12 eta 17 urte bitarteko Euskadiko eta Nafarroako ikasleek proposamen osasungarri eta berritzaileak egitera animatu nahi ditu, gure kulturaren gastronomian eta adinekoen errezeta tradizionaletan oinarrituta.

• Aurreko bi edizioetan 500 haurrek baino gehiagok parte hartu zuten, eta etxeko plater tradizionaletan oinarritutako 160 bideoerrezeta egin zituzten.

• Parte hartzeko epea gaur hasiko da, urriaren 4an, eta azaroaren 10era arte egongo da irekita. Irabazlearentzako saria BCC Culinary Club erakundean klase osoarekin tailer gastronomiko batean parte hartzea izango da.

Ausolan Fundazioak, Ausolan Taldearen irabazi asmorik gabeko erakundeak, eta BCC Culinary Club erakundeak, gizartean kultura gastronomikoa bultzatzeko eta sustatzeko Basque Culinary Center zentroko gastronomiaren zale sutsuei zuzendutako sailak, Sukaldean Sortzaile lehiaketaren V. edizioa jarri dute abian, etxeko plater tradizionaletan oinarrituta gazteak bideoerrezetak egitera gonbidatzen dituen lehiaketa gastronomikoa.

Joan den edizioaren arrakastaren ondoren, non 300 haurrek parte hartu zuten eta 90 bideoerrezeta egin ziren, Ausolan Fundazioaren Gozatu Osasuna proiektuaren esparruan dagoen ekimen honen bidez familietan ohitura eta bizitza-ingurune osasungarriak sustatu nahi dira, “gure kulturan gastronomiak duen garrantzia gogoraraziz eta gazteak haien aitona-amonen plater klasikoetan oinarritutako errezeta osasungarriak garatzera gonbidatuz” , Ausolan Fundazioak azaldu du.

Sukaldean Sortzaile proiektua ikasturteko lehen hiruhilekoan garatuko da, eta Euskadiko eta Nafarroako ikastetxeetako 12 eta 17 urte bitarteko ikasleetara zuzenduta dago. Ausolan enpresaren hezkuntzako proiektuaren barruan, ekimen honen helburua da “ohitura osasungarriak sustatzea eta gure adinekoekin denbora gehiago pasatzea, hori baita ezagutzako eta jardunbide egokietako iturri naturala” , adierazi du Ausolan enpresaren Euskadiko hezkuntzako proiektuaren taldeak. Proiektuak irakasten die ikasleei, haurtzarotik hasita, zer garrantzitsua den bizimodu osasungarria izatea, laguntzen du pertsona afektiboak, begirunetsuak eta solidarioak garatzen, eta gizartearen eta kulturaren beharrei erantzuten die.

BCC Culinary Club erakundean azpimarratu dute: “Sukaldean Sortzaile proiektuak garrantzia ematen dio aitona-amonen ohitura gastronomikoen ezagutza bilobei transmititzeari, eta erronka bihurtzen da gazteentzat, sormena erabili behar baitute proposamen gastronomiko eguneratua sortzeko” .

Lehiaketaren epeak eta finalisten hautaketa

Lehiaketan parte hartzeko epea gaur hasi da eta azaroaren 10era arte egongo da irekita, Sukaldean Sortzaile webgunean. “Ikastetxeek aukera izango dute taldeak antolatzeko, aitona-amonen errezeta bat sortu eta berridazteko, eta bideo bat grabatzeko errezetaren jatorria, zergatik hautatu den, zer urrats jarraitu behar diren eta zer tresna erabili diren azaltzeko. Gainera, platera bukatuta aurkeztu beharko dute” , zehaztu du Ausolan enpresak.

Izena emateko epea amaitzen denean, YouTube sarean “Atsegin dut” gehien jasotzen dituzten bideoen hautaketa egingo da.

Bigarren fasea ikastetxeetan egingo da, eta gehien gustatu zaien eskualdeko bideoa bozkatuko dute. Ondoren, BCC Culinary Club erakundeko eta Ausolan enpresako aditu-batzorde batek hautatuko ditu bideo finalistak, probintziaka. Azkenik, finalistak abenduaren 15ean Basque Culinary Center zentroan egingo den lehiaketaren amaierako galara joango dira. Bertan hautatuko dituzte talde irabazleak.

Ekimen honen bidez, Ausolan Fundazioak Nazio Batuen Garapen Iraunkorreko Helburuak lortzen lagundu nahi du, zehazki osasun eta ongizateari dagokiona. “Txikiak direnetik askotariko menu orekatuak diseinatzearen garrantzian irakatsi nahi dugu, tokiko osagaiak eta produktuak hautatuz plateren garapena eta lan egiteko modua ingurumenarekin jasangarriak izan daitezen” , esan du fundazioak.

Ausolan, Ausolan Fundazioa eta BCC Culinary Club 2019an hasi ziren lankidetzan. Harrezkero, hainbat proiektu garatu dituzte kolektibitateentzako sukaldaritzaren sektoreari zuzendutako kalitatezko sukaldaritza-proposamen berriak, osasungarriak, seguruak, jasangarriak eta zaporetsuak sortzeko helburuarekin.