Hemen dugu berriz ere Sukaldean Sortzaile lehiaketa gastronomikoa, gazteak eta adinekoak biltzeko helburua duen ekimena

• Ausolanek eta BCC Culinary Clubek antolatutako ekimenaren helburua da Euskal Autonomia Erkidegoko eta Nafarroako 12 eta 17 urte bitarteko ikasleek proposamen osasungarri eta berritzaileak gauzatzea, tokiko gastronomian eta beren aitona-amonen errezeta tradizionaletan oinarrituta.
• Aurreko bi edizioetan 500 haur baino gehiagok parte hartu zuten, eta 160 bideo errezeta prestatu zituzten, etxeko plater tradizionaletan oinarrituta.
• Parte hartzeko epea gaur hasiko da (urriak 2), eta azaroaren 4ra arte egongo da irekita. Irabazlearen saria izango da berak eta bere gelakideek BCC Culinary Clubeko tailer gastronomiko batean parte hartzea.

Ausolanek, bere Hezkuntza Proiektutik, eta BCC Culinary Clubek, hots, Basque Culinary Centerreko gastronomia zaleei zuzendutako arloak, gizartean kultura gastronomikoa bultzatzen eta sustatzen duenak, Sukaldean Sortzaile lehiaketaren VI. edizioa abiarazi dute: gazteak euren etxeko plater tradizionaletan oinarritutako bideo errezetak egitera gonbidatzen dituen lehiaketa gastronomikoa.

Ausolanen Hezkuntza Proiektuaren barneko ekimen honek aurreko edizioan izandako arrakasta ikusita (200 haurrek parte hartu zuten eta 70 bideo errezeta egin zituzten), aurten ere eskola jangela hezkuntza integraleko gune izatea sustatu nahi da, “gastronomiak gure kulturan duen garrantzia gogoratuz eta gazteak beren aitona-amonen plater klasikoetan oinarritutako errezeta osasungarriak egitera gonbidatuz”, adierazi du Ausolanek.

Sukaldean Sortzaile proiektua ikasturteko lehen hiruhilekoan egingo da, eta Euskal Autonomia Erkidegoko eta Nafarroako ikastetxeetako 12 urtetik 17ra arteko ikasleei zuzenduta dago. Ekimen honen helburua da “ohitura osasungarriak sustatzea eta gure adinekoekin denbora gehiago igarotzea, ezagutzaren eta jardunbide egokien iturri naturala baitira”, adierazi du Ausolanek EAEn duen Hezkuntza Proiektuko taldeak. Ekimenak, haurtzarotik hasita, bizimodu osasungarria izatea zeinen garrantzitsua den irakasten die ikasleei, pertsona afektiboak, errespetuzkoak eta solidarioak izateko hezten laguntzen die, bai eta gizarte eta kultura beharrei erantzuten ere.

BCC Culinary Clubek nabarmendu duenez, “Sukaldean Sortzaile proiektuak balioan jartzen du aitona-amonen ohitura gastronomikoen ezagutza bilobei transmititzea, eta erronka bihurtzen da proposamen gastronomiko eguneratu bat sortzeko beren sormen guztia aplikatu behar duten gazteentzat”.

Lehiaketaren epeak eta finalisten hautaketa

Lehiaketan parte hartzeko epea gaur hasiko da eta azaroaren 4ra arte egongo da zabalik, Sukaldean Sortzaile webgunearen bidez. “Ikastetxeek aukera izango dute beren taldeak sortzeko, eta aitona-amonen errezeta bat sortu eta berridazteko eta bideo bat grabatzeko, honako hauek azalduz: errezetaren jatorria, zergatik hautatu duten, zer urrats egin dituzten eta zer tresna erabili dituzten. Gainera, platera erabat bukatuta aurkeztu beharko dute”, zehaztu du Ausolanek.

Izena emateko epea amaitzen denean, YouTuben publikoak “atsegin dut” gehien emandako bideoen lehen aukeraketa egingo da.

Bigarren fasea ikastetxeetan izango da, eta gehien gustatu zaien eskualdeko bideoa bozkatuko dute. Geroago, BCC Culinary Clubeko eta Ausolaneko adituen batzorde batek aukeratuko ditu finalistak, probintziaren arabera. Eta, azkenik, finalistak abenduaren 13an Basque Culinary Centerren egingo den lehiaketaren azken galara joango dira, eta han izendatuko dira talde irabazleak.

Ekimen honen bidez, Ausolanek eta BCC Culinary Clubek Nazio Batuen Garapen Jasangarrirako Helburuak lortzen lagundu nahi dute, zehazki, Osasunari eta Ongizateari buruzko helburua. “Gure xedea da, hain zuzen, txiki-txikitatik erakustea zer-nolako garrantzia duen menu askotarikoak eta orekatuak diseinatzeak, tokiko osagai eta produktuen aukeraketa eginda, nola platerak hala lan egiteko modua ingurumenarekiko jasangarriak izan daitezen”, zehaztu du Ausolaneko Hezkuntza Proiektuko lantaldeak.

Ausolan eta Basque Culinary Center 2019an hasi ziren elkarlanean. Harrezkero, hainbat proiektu garatu dituzte, kolektiboentzako sukaldaritzaren sektoreari zuzendutako kalitatezko sukaldaritza proposamen berriak, osasungarriak, seguruak, jasangarriak eta zaporetsuak gauzatzeko.