Ausolan Fundazioak, Nafarroako Elikagaien Bankuak eta Nafarroako Rural Kutxak elikagaiak alferrik galtzea geldiarazteko eskola kanpaina bat jarri duten martxan

• Ekimena Nafarroako 26 ikastetxetan egingo da, Lehen Hezkuntzako 3. mailatik Lehen Hezkuntzako 6. mailara bitarteko ikasleekin, azken hiruhilekoko eguerdietan, jantokian.
• Erakundeek lankidetza hitzarmen bat sinatu dute, etorkizuneko belaunaldiak hainbat balioetan hezteko; besteak beste, elkartasuna, ingurumenarekiko errespetua, elikagaiak alferrik galtzeak ingurunean duen eragina eta gizarte erantzukizuna.

Ausolan Fundazioak –zerbitzu zein kolektiboentzako sukaldaritza zerbitzuak ematen dituen irabazi-asmorik gabeko erakundea–, Nafarroako Rural Kutxak eta Nafarroako Elikagaien Bankuak –NEB– Jarri balazta elikagaiak alferrik galtzeari kanpaina abiarazi dute, Nafarroako Elikagaien Bankuak (NEB) egiten duen lanarekin, elikadura laguntzarekin eta elikagaiak alferrik galtzeak ingurunean duen eraginarekin lotuta gazteen artean gizarte eta ingurumen erantzukizunaren kontzientzia handiagoa sortzeko.

Kanpaina eguerdi partean egingo da, urritik abendura bitartean, Nafarroako 26 zentrotako Lehen Hezkuntzako hirugarren mailatik seigarrenera arteko 1.500 gazte baino gehiagorekin. “Gazteenek ditugun baliabideak zaintzearen garrantzia ulertzea nahi dugu”, adierazi du Maria Marin Fundazioko lehendakariak. “Eta ikastetxeetako jangela garaia, hezkuntza integral eta jasangarriko gune gisa, gure gazteen ikaskuntzan laguntzeko une aparta bihurtzen da”, gaineratu du.

Proiektu honek aukera emango die gazteei NEBek egiten duen gizarte lana ikuspegi integratzaile batekin ezagutzeko: jarduera, boluntariotza, ikaskuntza proiektuak; baita “gosearen eta elikadura alferrik galtzearen arazoari buruzko kontzientzia sortzeko ere, horrek eragiten dituen ondorioekin eta elikagaiak gehien behar dituztenengana iristen direla bermatzeko gure misioan laguntzeko”, nabarmendu du Nafarroako Elikagaien Bankuko Maria Soledad Villarrek.

Bestalde, Nafarroako Rural Kutxako Javier Martinezek adierazi du hitzarmen honek “gizarte erakundeekin, komunitatearekin eta ingurunearekin dugun konpromisoa indartzen” duela. “Funtsezkoa da belaunaldi berriek jakitea zeinen garrantzitsua den keinu txiki bakoitza gizartearen eta planetaren ongizaterako”.

Jarri balazta elikagaiak alferrik galtzeari kanpainan, 45 minutuko bi saio egiten dira. Saio horietan, ikaskuntza testuinguru bat sortzen da jolas hezitzaile baten bidez. Hala, Nafarroako Elikagaien Bankuaren webgunetik bertatik eskuragarri dagoen online abentura grafiko batean murgiltzen dira.

Ekimen hau, hain zuzen, joan den uztailean zero hondakin lortzen laguntzeko konpromisoarekin hiru erakundeek sinatutako lankidetza akordioaren barneko ekintzetako bat da.

Ausolan Fundazioaren Stop Goseari proiektuko kanpaina bat da. Helburua da gosea gutxitzea
–batez ere haurrena eta adineko pertsonena–, soberakinak dohaintzan emanda elikadura alferrik galtzea geldiaraztea eta beste erakunde batzuekin lankidetzan aritzea.